स्वागतम

मनका भावका  कैयन रुप  हुन्छन । मनमा रहेका बिभिन्न भाव जस्तै हर्ष दुख पिडा खुशी बेदनाहरु कुनै न कुनै रुपमा भने अवश्य आएका  हुन्छन  चाहे त्यो अव्यक्त रुपमा होस् अथवा ब्यक्त रुपमा ।  यस्ता भावहरु  कि त शारीरिक हाउभाउ कि त बोलीको माध्यम बाट प्रस्फुटित हुने गरिन्छ । र जनमानसमा लेखन माध्यम बाट  यसको सन्देश प्रभाव  सिर्जना वा प्रवाहित माध्यम नै साहित्य बन्ने गरेको छ ।

आदिम काल देखि नै साहित्यको   प्रार्दुभाव भएता पनि कालान्तर मा मात्र यसको बिस्तार भएको पाइन्छ  र आजको यो समयसम्म  आइपुग्दा साहित्य क्षेत्र धेरै  परिस्कृत भएको छ ।  छन्द गद्य ठाउँमा मुर्त अर्मुत जस्ता शब्दले स्थान लिएको अवस्था छ तथापि स्वरुप परिवर्तन हुदा पनि रचनाहरुको मिठास अझै पनि कायम छ । उस्तै स्वादिलो छ । 
गीति लेखनकार्य बाट शुरु भएको मेरो साहित्यिक यात्रा   त्यसपछि कविता लघुकथाहरु हुदै अगाडि बढिरहेको छ । हालसम्म कैयन गीत कविता लघुकथाहरु बिभिन्न साहित्यिक पत्रिका बिशेष गरी साप्ताहिक खवर पत्रिकाहरु बिभिन्न साहित्यिक अनलाइनहरु मा प्रकाशित भइसकेका छन् भने कैयन त्यसै थन्किरहेका छन ।
तिनै प्रकाशित रचनाहरु यस ब्लग मार्फत फेरी सार्वजनिक गरेको छु । बिभिन्न साल बिभिन्न मितीमा प्रकाशित रचनाहरुको स्रोत पनि खुलाएको छु । र भविष्यमा पनि प्रकाशित अन्य रचनाहरु पनि अधावधिक गरिदै लगिने छ ।

- ठाकुर मान लामा

कविता

स्वागत नयाँ बर्ष
रचना : ठाकुर मान लामा

फेरि आयो मनमा नयाँ जोश छर्न
खुशी र उमंगको उदघोष गर्न
भोलीका सुनौला दिन अनि विहान
साँच्दै नयाँ सपना र कल्पना
आयौ तिमी फेरी हर दैलो दैलोमा

हिजोका ती नमिठा तित्तता मेटन
हिजोका थुप्रिएर रहेका रित्तता भर्न
द्वेश र घृणाको खाडल पुर्न
माया अनि ममताको सागर बाडन
आयौ तिमी फेरी हर दैलो दैलोमा

जीवनलाई लालीगुराँस झै फुलाउन
प्रगतिपथको त्यो वाटोमा डोर् याउन
चिर्दै त्यो दुःखको भुवरीलाई
समुन्नत भविष्यको आशमा अनि मुस्कानमा
आयौ तिमी फेरी हर दैलो दैलोमा

स्वागत हे नयाँ वर्ष तिमीलाई
स्वागत छ तिमीलाई
हर दैलौ दैलोमा
हर दैलो दैलोमा

श्रोत : घटना र बिचार