कविता
शहीदको मौन भाषा
रचना - ठाकुर मान लामा
हेर तिमी आकाशमा
ताराहरूलाई
शायद तिमीलाई नै
हेरिरहेका छन् कि
तिमीलाई गिज्याइरहेका छन् कि
यस देशलाई हाँक्छु भन्ने
तिम्रो घमण्ड र तिम्रो चरित्र हेरी
तिमीलाई जिस्क्याइरहेका छन् कि
सुम्पेर तिमीलाई नै
यो देशको जिम्मा
आफूले दिएको बलिदान
व्यर्थै गएछ भनी सोच्दै छन् कि
कस्तो थियो मुलुक यो
कस्तो पारिदियौ
भनी रोइरहेका छन् कि
देशको छवि बिगार्ने तिमीलाई
मनमनै दुत्कारिरहेका छन् कि
हत्या, हिंसा, अशान्ति मात्र
तिम्रो शासनमा देखी
मुटु दुखाई चिच्याइरहेका छन् कि
तिम्रो हरेक क्रियाकलापको
समीक्षा गरी
तिमीलाई धिक्कारिरहेका छन् कि
त्यसैले बदली आफूलाई
बुझ उनीहरूको
मौन भाषा
श्रोत : घटना र बिचार / नेपाल एचके
