कविता

खै त न्याय ?
रचना - ठाकुर मान लामा

खै अब त
न्याय खोज्न पनि जाने कहाँ
देख्दिन कतै पनि न्याय यहाँ वहाँ
न्यायको त नामोनिशान गरीसकेछन् स्वाहाँ
किनभने दुनियाले त
देखिसकेका छन् न्याय दिनेहरुको पारा
न्यायलाई बनाईसकेछन् अर्धमीहरुको आहारा
देखि यस्तो बिजोग न्यायको त्रसित छन् सारा
यो बिजोग त्यसै भएको होईन
गरीव माथि दिएर गरीवी निवारणको भाषण
नीति मात्र फ्याकी आफुचाही सुनमाथि आसन
देशको ढुकुटी रीत्याई चलाए भन्छन् सुशासन
अनि कसरी हुन्छ त न्याय ?
बेचिन्छन् गाउँका चेलीबेटि कैयन चोटि कैयन देशमा
घुम्छन् बेच्ने चाही रोवरवाफले गाउँ बिभिन्न भेषमा
समातिए घुस लिई छाडीदिन्छन् संरक्षक आफ्नै मेषमा
अनि कसरी हुन्छ त न्याय ?
दिनानुदिन बालबालिका अपहरणमा परिन्छन्
केही दिनभित्रै हत्या गरीएका सुचीमा दरीन्छन्
र बालहत्यारा चाही सधै फरार भनिन्छन्
अनि कसरी हुन्छ त न्याय ?
खुल्छन् कहिलेकाही कलकारखाना यो ठाउँमा
सुन्दैनन् मजदुरका आवाज खाली बन्द गर्ने दाउँमा
अनि गर्छन् याचना अनगिन्ति सरकारसँग सुरक्षाको नाउँमा
गरे मुक्त दलित कमैया भूमिको बातमा
न त जग्गा न त खानपीन पारीदिए घरको न घाटमा
त्यसैले त जे जे पायो त्यही बोल्छन् नेता आफ्नै मातमा
अनि कसरी हुन्छ त न्याय ?
बाढीपिडित भोकले ग्रसित खानाको माग गर्छन्
पाउँछन् चामल त्यो पनि सडेगलेको पर्छन्
बाध्यता भई खान्छन् त्यही अनि रोगी भई मर्छन्
अनि कसरी हुन्छ त न्याय ?
यस्तै अनगिन्ति अन्यायको भण्डार छ
न्याय खोज्न जानेको सधैं यहाँ हार छ
यस्तै हारको पिडाले पनि दिनानुदिन मानिसलाई मार्छ

श्रोत : दोबाटो

गीत

नेपाली माया

रचना - ठाकुर मान लामा

सुन्दर सुन्दर झरनाहरु

सुन्दर सुन्दर पहाडहरु

यस्तै नै माया पाएको छु

जहाँ जाउ मैले

नेपाली माया पाएको छु

ठूलो भारी बोकी हिड्ने दाई हलो जोत्दैछ

घाँस स्याउला बोकी हिड्ने दिदी लिपपोत गर्दैछिन्

हाँसी दिन्छन् अरुलाई निधारको पसिना पुछी

दिन्छन् पिउन मोही हजुर अँागनीमा बसी

सुन्दर सुन्दर आँगनहरु

सुन्दर सुन्दर मुस्कानहरु

यस्तै नै माया पाएको छु

जहाँ जाउ……………

उटिङ्ट्याङ खेल्दै हिड्ने भाई मादल ठोक्दैछ

चानाना भन्दै हिड्ने बहिनी गाउदै नाच्दैछिन्

सघाउदै हिड्छन् अरुलाई गर्दै मिठो बोली

त्यसैले त हाँसी दिन्छ यो धरती दिलै खोली

सुन्दर सुन्दर बस्तीहरु

सुन्दर सुन्दर लेक बेसीहरु

यस्तै नै माया पाएको छु

जहाँ जाउ ………

सुन्दर सुन्दर झरनाहरु…………।

श्रोत : दोबाटो

गीत

पखाल्ने मिल्ने सक्ने भए
रचना - ठाकुर मान लामा

पखाल्न मिल्ने सक्ने भए यी दागहरु आँशुले नै पखालीदिन्थे
मेट्न मिल्ने सक्ने भए यी रेखाहरु भाग्य बदल्न मेटिदिन्थे

साँघुरो जीवन अत्यास लाग्ने भएछ नी
कस्तो जीवन सस्तो लाग्ने भएछ नी
पहाडसँग जुध्ने साहस त्यो पनि हराएछ नी

फेर्न मिल्ने सक्ने भए यी मनहरु मुटलाई नै फेरी दिन्थे
मेट्न मिल्ने सक्ने भए.........................

यस्तै जीवन भइदिएछ
काँचको सिसा टुकि्रएर
भुइमा चकनाचुर भइदिएछ
सार्थक लाग्ने जीवन पनि अर्थहिन भइदिएछ

जलाउन मिल्ने सक्ने भए यी पापहरु आगो लगाई जलाइदिन्थे
मेट्न मिल्ने सक्ने भए......................

पखाल्न मिल्ने सक्ने भए....................
मेट्न मिल्ने सक्ने भए.......................

श्रोत : समकालीन साहित्य

गीत

चाहे आँधी आओस
रचना : ठाकुर मान लामा

चाहे आँधी आओस् चाहे तुफान आओस्
मेरो देशको निम्ति म प्राण दिन्छु

रोकेर रोकिन्नन् पाइलाहरू सामुन्ने काँडैकाँडा नहोस् किन
खुसी हुनेछु बरु बैरीलाई झुकाएको दिन

चाहे वर्षा लागोस् चाहे गर्मी छाओस्
मेरो देशको निम्ति म प्राण दिन्छु

सहन्छु सबै चोटहरू घाउ लागे पनि
हुन दिने छैन आमा तिमीलाई कहिल्यै दुःख पनि

चाहे आगोले रोकोस् चाहे चट्टानले छेकोस
मेरो देशको निम्ति म प्राण दिन्छु

व्यर्थै नजाओस् यो जुनी पुज्न कहिल्यै छाड्ने छैन
हँसिलो मुहार पार्न तिमीलाई म पछि हट्ने छैन

चाहे रात ढलोस् चाहे दिन बितोस
मेरो देशको निम्ति म प्राण दिन्छु

चाहे आँधी आओस् ...............

श्रोत: घटना र बिचार / नेपाल ऐच के

कविता

धनको मृत्युलोक
रचना - ठाकुर मान लामा

हे मानिस अझै कति धनकै पछि लाग्छस्
त्यही धनले तँलाई तँबाट टाढा बनाउनेछ
जुन धनलाई राखी तँ आफूलाई धनी ठान्छस्
त्यही धनले तँलाई कङ्गाल बनाउनेछ
जुन धनलाई तँ आफन्त ठान्छस्
त्यही धनले तँलाई दुनियाँबाट पर्राई बनाउनेछ
जुन धनलाई तँ मोजमस्तीमा प्रयोग गर्छस्
त्यही धनले तँलाई सडकको भिखारी बनाउनेछ
जुन धनलाई तँ इज्जत ठान्छस्
त्यही धनले तँलाई बेस्सरी थुक्नेछ
जुन धनलाई तँ स्वर्ग ठान्छस्
त्यही धनले तँलाई नरकमा जाक्नेछ
जुन धनले तँ आफूलाई सत्जन ठान्छस्
त्यही धनले तँलाई पापी बनाउनेछ
जुन धनलाई तँ ईश्वर ठान्छस्
त्यही धनले तँलाई दैत्य बनाउनेछ
जुन धनलाई तँ पूजा गर्छस्
त्यही धनले तँलाई रोगी बनाई आर्यघाट पुर्‍याउनेछ
हे मानिस बुझ यहाँ कोही अजर, अमर छैन
मृत्युपछि धन तँसँग जाँदैन
गर्लास् तैंले मोजमस्ती र्दुइ दिन
भन्दैन मृत्युले तँलाई एकछिन
सोच्लास् धनले तँलाई ब्युँताउनेछ कि
यसो सोच्छस् त तँ पागलै पो छस् कि
तर्सथ यसो विचार गरी हेर
झट्ट नत्र मृत्युलोकमा पुर्‍याउन के बेर
झट्ट नत्र मृत्युलोकमा पुर्‍याउन के बेर

श्रोत : घटना र बिचार / नेपाल एचके

गीत

धरतीपुत्र हौ हामी
रचना - ठाकुर मान लामा

धरतीपुत्र हौ हामी यी धरती माताको
गाउछौ सबै मिली जय होस नेपालको
जय नेपाल जय नेपाल जय नेपाल
जय नेपाल जय नेपाल जय नेपाल

शहीदको रगत बग्दछ नशा नशा भरी
झुक्दैन शिर हाम्रो हुन्नौ दास कहिल्यै नी
हाम्रो मान ईमान स्वतन्त्रताको मूल हो
सागरमाथा माथि फर्फराउछ ध्वजा हाम्रो सान यो
जय नेपाल जय नेपाल जय नेपाल
जय नेपाल जय नेपाल जय नेपाल

बिरताको इतिहास लेखिएको छ छातीभरी
सधै भरी फुल्ने यो हाम्रो साझा फुलबारी
यो माटोको सुबास हाम्रै पौरख बन्छ
नेपाली हौ हामी नेपालकै माया लाग्छ
जय नेपाल जय नेपाल जय नेपाल
जय नेपाल जय नेपाल जय नेपाल

धरतीपुत्र हौ हामी ............
गाउछौ सबै मिली ............
जय नेपाल जय नेपाल जय नेपाल
जय नेपाल जय नेपाल जय नेपाल

श्रोत : नेपाली साहित्यिक मंच

गीत

तिमी सपनीमा आऊ
रचना - ठाकुर मान लामा

तिमी सपनीमा आउ तिमीलाई परी देख्छु
तिमी बर्षायाममा आउ तिमीलाई झरीदेख्छु

सङगालेको माया यो ढुकढुकीमा अझै पनि धडकिरहेछ
तिम्रा यादहरु अझै यो मनमा छाईरहेछ

तिमी वनपाखामा आउ तिमीलाई फुल देख्छु
तिमी अधेरीमा आउ तिमीलाई जुन देख्छु

सङलो माया दिन्छु तिमीलाई सागरको पानी जस्तै
निश्चल माया भावनामा बगे अमर हुन्छ सधै

तिमी गीतमा आउ तिमीलाई सरगम देख्छु
तिमी कथाको पानामा आउ तिमीलाई अक्षर देख्छु

तिमी सपनीमा आउ
तिमी बर्षायाममा आउ

श्रोत : समकालीन साहित्य

गीत

धेरै धेरै अर्थ लाग्छ तिमीले शीर झुकाउँदा
रचना - ठाकुर मान लामा

धेरै धेरै अर्थ लाग्छ तिमीले शीर झुकाउँदा
धेरै धेरै अर्थ लाग्छ गाला रातो पारी लजाउँदा

यस्तै हुन्छ होला पहिलो पहिलो माया
सधै देखूँ हुन्छ होला उसकै मात्र छाया

धेरै धेरै अर्थ लाग्छ भोक निद्रा हराउँदा
धेरै धेरै अर्थ लाग्छ सिरानमै उसलाई सम्झिँदा

कहिले भेटूँ हुन्छ होला उसले बोलाउदा
कसरी मनका कुरा ऊ सामु राख्ने होला

धेरै धेरै अर्थ लाग्छ सबै चीज प्यारो लाग्दा
धेरै धेरै अर्थ लाग्छ संसार नै आफ्नो भनिदिँदा

श्रोत: तन्नेरी डट कम

कविता

निर्दिष्ट पहिचान

रचना - ठाकुर मान लामा

मेरा सारा अंग प्रत्याङ्ग

सम्पुर्ण रूपले सबल छन

तथापि म आफ्नो

निर्दिष्ट पहिचानको खोजीमा छु

मेरा मन मस्तिष्कमा

सरस्वती माताको ज्ञान सदा सल्बलाउँछन

तापनि म आफ्नो

निर्दिष्ट पहिचानको खोजीमा छु

मेरा कर्म मर्महरु

जहिले पनि धर्मानुसार चल्छन

यति हुदा पनि म आफ्नो

निर्दिष्ट पहिचानको खोजीमा छु

मेरा गरिएका भनिएका कामहरु

सधै उच्च कोटिमा दर्ने गरिएका छन

तर पनि म आफ्नो

निर्दिष्ट पहिचानको खोजीमा छु

मेरा मान प्रतिष्ठा इज्जत

जताततै सर्बब्यापी छन

र पनि म आफ्नो

निर्दिष्ट पहिचानको खोजीमा छू

त्यसैले मेरो मन खिन्न छ

नाम दाम इज्जत प्रतिष्ठा जति भए पनि

केही नभएको खोक्रो हावा भरिएको

अस्तित्वबिहिन लाग्दछ

गंतब्य हुदाहुदै पनि

लक्ष्य बिहीन भएर यात्रा गरेको लाग्दछ

र म आफै पनि

आफैसंग टाढा भागेको लाग्दछ

तर पनि मैले हार मानेको छैन

आफ्नो एउटा बलियो अस्तित्व
मैले आफैले बनाउनु छ

यही बलियो अस्तित्व भित्र

मैले निर्दिष्ट पहिचान खोज्नु छ

जसले मलाई म भन्ने

आँट दिलाओस

र

यही अस्तित्व भित्र लिप्त हुन सकुँ

यही निर्दिष्ट पहिचानमा ब्याप्त हुनसकुँ

श्रोत : नेपाली साहित्यिक मंच

गजल

बिश्वाश
रचना - ठाकुर मान लामा

बिश्वास तिम्रैमा यति धेरै जिएँ
अन्तमा खालि आँसुको सागर पिउनु पिएँ
बिश्वास तिम्रोमा नै तिम्रो गीत गाएँ
किन हो त्यहि गीत आज बिरह र निरस बनी छाए
बिश्वास तिम्रोमा नै माया दिएको थिएँ
तर बदलामा छायाँ मात्र किन हो आज सम्म लिएँ
बिश्वास तिम्रो जति गर्दै गएँ
त्यत्तिकै जिन्दगिमा हण्डर पनि त्यसरी नै खाएं
बिश्वास तिम्रो यति धेरै पाएँ
त्यसैले त आज सम्म दुख्न सम्म दुख्यो मुटु हाय

श्रोत : संगालो डॉट बी

कविता

मंगलमय शुभकामना
रचना - ठाकुर मान लामा

नबनोस् आशुँ यो पीर कसैको दशैं तिहारमा
नपरुन कोही कतै पनि जीउनु दासत्वमा
साथ होउन् सबैजना खुशी छाउन सदा सदा
आशिष थाप्छु दॆउ माता गर्छु ह्रदय देखि प्रार्थना
दिउन माता दुर्गा भवानी शक्ति सबैजनामा
बसुन् बास माता लक्ष्मी हरेकको मनमा
पाप श्राप सबै मौलि जाउन् नआओस् फेरी जीवनमा
मंगलध्वनी गुन्जियोस हर किनार बहारमा
शान्ति समृद्धि छाईरहोस् हर मोडमोडमा
सुखसयल बनिरहोस् जहीतही एक एक कूनामा

श्रोत: समकालीन साहित्य

गीत

मरेको छैन त्यो जीउदो छ अझै
रचना - ठाकुर मान लामा

मरेको छैन त्यो जीउदो छ अझै
देशको निम्ति मर्नेहरु अमर हुन्छ सधै

एउटा तारा खसेर के भो
असंख्य तारा भेटिन्छन्
देशको रक्षार्थ निम्ति कयौं
वीर सपुतहरु जन्मिन्छन्
डराउदैनन् उनीहरु बरु
बनिदिन्छन् शहिदहरु
मरेको छैन................

आफ्नो प्राणभन्दा देशलाई
शीर माथि राख्दछ
जन्म्यो त्यो धर्तीमा
यसैका लागि बाच्दछ
माग्दैनन् उनीहरु बरु
अर्पिदिन्छन् प्राणहरु
मरेको छैन .......

सच्चा माया गर्छन्
देशलाई उनीहरु
यसमाथि पर्न दिन्नन्
पर्राईका छायाहरु
भाग्दैनन् उनीहरु बरु
फोडिदिन्छन् पहाडहरु
मरेको छैन त्यो जीउदो छ अझै
देशको निम्ति मर्नेहरु अमर हुन्छ सधै

श्रोत: तन्नेरी डट कम

गीत

मुखले नबोले पनि आँखाले बोलिदिन्छ
रचना - ठाकुर मान लामा

मुखले नबोले पनि आँखाले बोलिदिन्छ
जति टाढा होऊ तिमी सम्झना चै मनमै हुन्छ

भुल्न खोजेपनि भुलिदैन माया
जता हेर्‍यो उतै तिमी देख्छौ मेरै छाया
जति रीस गरेपनि माया मनमै हुन्छ
जति टाढा होऊ तिमी सम्झना चै मनमै हुन्छ

झरेको आँशुभित्र माया लुकेको हुन्छ
सामुन्ने मलाई नदेख्दा मेरै गीत बज्छ
तर्केर हिडेपनि माया मनमै हुन्छ
जति टाढा होऊ तिमी सम्झना चै मनमै हुन्छ

मुखले नबोले पनि आँखाले बोलिदिन्छ
जति टाढा होऊ तिमी सम्झना चै मनमै हुन्छ

श्रोत : तन्नेरी डट कम

कविता

हजारौँ चोटि
रचना - ठाकुर मान लामा

हजारौँ चोटि नियाली हेरे
तिमी आईछ्यौ कि भनेर
तर
भ्रम मात्र रहेछ
बतासको सुस्केरासँगै आउने त
रुखको पात पो रहेछ

हजारौं चोटि कोशिश गरेँ
तिमीलाई बिर्सन्छु कि भनेर
तर
मनले मान्दै मानेन
पुर्णिमाको रातमा उदाउने चन्द्रमालाई
केही गरी पनि नउदाऊ भन्न सकिँन

हजारौँ चोटि प्रयास गरे
तिमीदेखि टाढा हुन्छु कि भनेर
तर
अहँ मैले सकिन
आफ्नोछातीभित्र रहेको मुटुलाई
चट्ट चुँडाल्न पनि त म सक्दिन

श्रोत : तन्नेरी डट कम / शब्दांकुर

कविता

कुर्सी मोह भाग- २
रचना - ठाकुर मान लामा

मोह त्यो प्यारो कुर्सी अति नै
राष्ट्रपति खाउँ कि प्रधानमन्त्रीको
एउटा बनुँ बन्छु देशको सर्बोच्च नै
अर्को झन् छैन कम्तीको चानचुनको

प्रथम राष्ट्रपति हुन मलाई पनि मन छ
तर पावर छैन प्रधानमन्त्री नै बनुँ लाग्छ
जनताको आदेश शिरोपर गर्नु त पर्छ नै
दोधारमा पारिदिन्छ र पो कुन चाहिमा बसुँ ख्वै

सपनामा देखेको त राष्ट्रपति नै हो
भित्ताभरी लेखन गराइएको पनि राष्ट्रपति नै हो
साथीहरुले पहिला देखि नै भन्दै आएको राष्ट्रपति नै हो
तर पावरले पो धोखा दियो यो पद भइदियो घरको न घाटको

दुइतिहाइको साटो साधारण बहुमत बनेको छ पासो
त्यसैले त साथी तिमीले कहाँ पाउछौ र मेरो ओठमा हाँसो
पारित गरिदिए ठुलो स्वरले घोक्रो फुट्ने गरी
तर कुर्सी तोड्न मन छैन कसैगरी

नयाँ नेपाल नयाँ नेपाल भनेर आकै हो
जितेर यहाँ आएपछि कुर्सी नै चाहिने भो
साँचेको पो हो नयाँ नेपालको कल्पना सपनामा
थोडै साकार गर्छ भनेको छु र बिपनामा

आफुलाई त पहिला पनि कुर्सी चाहिन्थ्यो
अहिले पनि चाहिन्छ त्यसैलै के पछि हटिन्थ्यो
छाडिदेउ त्यागिदेउ नयाँ नेपाल बनाउँछु भन्ने कुरा
हामीलाई पनि गर्न देउ एक्सरसाइज कहाँ पाउनु र फेरी अर्कौ मौका

श्रोत : सिस्नुपानी नेपाल को डामाडोल डट कम

कविता

कुर्सी मोह
रचना - ठाकुर मान लामा

हैन यो कुर्सीको मोह पनि कस्तो कस्तो
जहा गए पनि छोड्न मन नलाग्ने के भा यस्तो
पहिले पहिले भुइमा पलेटी मारेर बस्दा पनि हुने
अहिले एक छिन बस्न नपाउदा ढाड दुखेर आउने

भोज भतेर सेमिनार जहा पनि कुर्सी चाहिने
बसेर केही क्षण भए पनि शान देखाउन पाइने
अचेल सुत्ने खाटनीर एउटा कुर्सी नभई हुदैन
कसैले चोरेर लैजाला त्यसैले रातमा निदै आउदैन

यही कुर्सीमा बस्दा आफुलाई संसारकै मालिक ठान्छु
नजरबाट ओझेल हुदाा केही गुमाएको जस्तो पाउछु
जताततै कुर्सी नै कुर्सी यो आखाले देख्छु
के भा यस्तो मलाई बताइदेउन मित्र तिम्रो पाउ पर्छु

कोही बसिदेला यसमा चनाखो भई यसो हेर्छु
छ भने एक लात दिदै बेस्सरी झपार्छु
बस्न कोही पाउदैन नातावाद होस् कि कृपावाद
यही एउटा त छ जय होस कुर्सी सधै जिन्दावाद

श्रोत : सिस्नुपनी नेपाल को डामाडोल डट कम

कविता

बिशाल मन
रचना - ठाकुर मान लामा

बिशाल मन कसैको छ ?
तिमी भन्छौ - तिम्रो छ ।
उ भन्छ - उसको छ ।
शायद म पनि भन्छु - मेरो छ ।
तर गर्व साथ छाती फुलाएर
कसैले पनि भन्न सक्दैन
कि मेरो मन बिशाल छ

पैसा हुनेले
केही मगंतेहरुलाई जम्मा पारेर
केही पैसा उनीहरुको
पटुल्कोमा फ्याकिदिदैमा

वा

आफ्नो प्रसिद्धि दर्शाउन
आफ्नो नाममा च्यारिटी
खोलिदिदैमा

वा

समाज सेवकको ढोंगी रची
केही बिधाथिॅलाई
छात्रबृति
उनीहरुको हाथमा
थमाईदिदैमा

वा

आफ्नो शान देखाउन
ठुल- ठुला भोज भतेर
भब्य आलिशान महलमा
आयोजना गर्दैमा

वा

आफ्नो पहुचको भान दिलाउन
केही आफ्ना नातागोतालाई
पैसा हुने खाने ठाउँमा
पद दिलाईदिदैमा

बिशाल मन छ मेरो
भन्नु कदापि
सुहाउदैन

बिशाल मन
त्यति बेला हुन्छ
जब
मनमा
न त रीस राग
न त वैमनस्यता
न त ईर्ष्या
न त भेदभाव
न त पाप
अरुप्रति
चिताएको हुन्छ

बिशाल मन
त्यतिबेला हुन्छ
जब
मनले
आफ्नो धर्म
आफ्नो कर्म
भन्दा माथि उठेर
अरुकै स्वार्थलाई
ठुलो ठान्दछ

बिशाल मन
त्यति बेला हुन्छ
जब
मनमा
आफ्नो स्वाभिमान
आफ्नो मान ईमान
आफ्नो ज्यान
देश र जनताको
लागि समर्पित
हुन जागृत बढेको हुन्छ

बिशाल मन
त्यतिबेला हुन्छ
जब
मनमा
आफुले गरेको काम
आफुले गरेको कर्तब्य
लाई तुच्छ ठानी
सदैव
मिली सबैसित
अरुकै हित
हुन अग्रसर प्रेरित हुन्छ

बिशाल मन
त्यतिबेला हुन्छ
जब
मनमा
आफ्नो मन बिशाल
छ भन्ने
सोच , भावना
परित्याग भएको हुन्छ

श्रोत : शब्दांकुर

कविता

हर्केको समय
रचना - ठाकुर मान लामा

हिजोको त्यों गाउँले हर्के
अब त्यों हर्के रहेन
हरिष भनी चिनाउछ आफुलाई
खुट्टा त्यसको भुइमै छैन

छाप्रोको त्यों बास
गाउमै छोड़ने भएछ
नफर्किने बिचार गर्यो
सहरमै महल ठड्याएछ

ऋण जति कति हो कति
बा आमालाई थोपरेर
एक पैसा पठाउदैन
उल्टै माग्छ पठाईदेऊ भनेर

गुन्द्रुक ढिडोमा रमाउने
भन्छ अहिले पच्दै पचेन
आधुनिक खाना थालभरि
कहिल्यै पुग्यो चाही भन्दैन

मोजमस्तिमा रम्दै हिड्ने
गाउँको त्यों पाखा भीर बिर्सिसकेछ
स्वच्छ हावा शुद्ध पानीको सट्टा
कालो धुवा अनि ठर्रा पिउन सिकेछ

गाउँले ती साथीसंगीलाई
आज पाखेको रुपमा चिन्दैछ
कानमा मुन्द्रा, कालो चस्मा लाउने
पराई भए पनि आफ़न्त ठान्दैछ

वाह हर्के
समयले तिमीलाई यस्तो बनायो
वा
तिमीले समयलाई यस्तो बनायौ
त्यों भने बुझ्न बाकी नै छ

श्रोत : डब्लू एन एस ओ